OpenTTD 0.7.0

Por fin, a nova versión estable do OpenTTD xa está dispoñible ao público. Os cambios máis relevandes desta versión 0.7.0 son, entre outros:

• traballouse nun sistema de ordes renovado,
• posibilidade de posuír moitos máis mecanismos,
• sinais baseadas nos camiños,
• un framework da intelixencia artificial que permite a quen o desexe facerse a súa propia IA,
• descarga directa de intelixencias artificiais e fgráficos desde un servidor principal (cando o autor así o desexe),
• bordos terrestres nos mapas,
• inicio do soporte para linguas escritas de dereita a esquerda, coma o árabe e mailo hebreo,
• incremento ou decremento dun bo número de límites: tamaño das fiestras, número de fiestras, clientes en liña (agora 255), compañías (agora 15);
• seis novas traducións: ao árabe, hebreo, lingua indonesia, letón, luxemburgués e galés.

Fonte: sitio web do xogo

OpenTTD 0.7.0
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

OpenTTD 0.7.0-RC2

Xa temos unha nova versión do OpenTTD, a 0.7.0 RC2, que podería ser a derradeira release candidate antes da 0.7.0 final. Hai unha lista de cambios completa onde, como podedes observar, non hai máis que correccións de erros. Canto credes que ha tardar a versión final? A ver se a sacan e probo o xogo dunha vez.

Fonte: sitio web do xogo

	OpenTTD 0.6.3
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

OpenTTD 0.7.0 RC1

Os desenvolvedores do OpenTTD, un xogo de simulación no que nos poremos ao mando dunha compañía de transportes, sacaron xa a que podería ser a derradeira versión previa á vindeira versión estable. Trátase da release candidate da versińo 0.7.0.

Quen queira coñece-los cambios, pode ve-la lista deles, aínda que son fundamentalmente correccións de erros da versión anterior, e coido que tampouco paga moito a pena pararse a velos. O que si paga a pena é esperar que, en moi pouco, teremos unha brillante versión final instalándose (ou compilándose) nas nosas computadoras. Mi ma, falo como se fose o meu xogo preferido e aínda non o probei. Tócame facelo en canto o saquen, así que:

Desenvolvedores, movede o cú!

Máis nada. Isto foi simple palla. Procurarei conpensarvos mañá!

Fonte: sitio web do xogo

	OpenTTD 0.6.3
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

Rigs of Rods 0.36.1, correccións

Dixen na última anotación respecto deste xogo que non había volver escribir acerca del mentres que non houbese a disposición pública un código fonte, compilable en GNU/Linux. Pois ben, alégrome de que non se fixesen de rogar.

Os desenvolvedores do Rigs of Rods, un xogo de simulación automovilística que adquiriu moita sona recentemente debido á decisión dos seus dous desenvolvedores de libera-lo código, veñen de lanzar unha versión nova, a 0.36.1, na que se adicaron fundamentalmente á corrección de erros.

Por certo, algunha vez vos preguntáchedes por que a maioría dos xogos libres, no número da versión, sempre van cun 0. diante? Eu si. Supoño que é porque teñen grandes espectativas para a primeira versión (a 1), pero manda c*r*llo, ás veces deprímeme ver bos xogos que comezan por cero. Se esperan que a un teña o nivel de xogos comerciais, imos aviados.

Respecto aos cambios concretos, pra dici-la verdade non foron moitos. Que se o xogo se colgaba cando activava-la herba, que se había problemas visuais en terreo e coches. En fin, pequenas solucións pra grandes problemas. Agradécese.

Anímovos iso si a compila-lo xogo. Eu non fun quen de facelo. A compilación comezou a dar erros en torno ao 57%, e esc*r*llouse. Supoño que pode ter que ver co feito de usar 64 bits, pero as instrucións do xogo dan instruccións específicas en función do número de núcleos do procesador… En fin, moita sorte aos que o intentedes.

Fonte: blogue do xogo

	Rigs of Rods 0.36.1
Xogo de simulación de automóbiles que salienta polas posibilidades de deformación dos vehículos.
Sitio web: rigsofrods.blogspot.com

OpenTTD 0.7.0-beta2

A segunda beta da futura versión estable do OpenTTD, a 0.7.0, xa está dispoñible pr’a súa descarga na páxina correspondente.

Un dos cambios (na miña humilde opinión) máis salientables nesta nova entrega é a posibilidade de descargar mapas dende o descargador de contidos interno do xogo. Así mesmo, cabe salientar a inmensidade de correccións que se fixeron nesta versión, listadas todas elas xunto coas novas características na lista de cambios.

Fonte: sitio web do xogo

	OpenTTD 0.6.3
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

Billiards 0.2.1

O Billiards, un software de simulación de xogos de billar, xa liberou a súa versión 0.2.1.

Esta versión non contou con grandes cambios. Fixéronse algunhas pequenas correccións de cara a face-la aplicación compatible con ODE, e resolvéronse algúns problemas respecto da situación inicial das bólas no taboleiro.

Aínda así, como deduciredes pola fermosa imaxe con que vos ilustro esta anotación, o xogo é prometedor. E tendo en conta que o proxecto BillardGL leva tempo descoidado, probablemente se trate do mellor software deste tipo libre dispoñible e con futuro.

Fonte: HappyPenguin

	Billiards 0.2.1
Software de simulación de xogos de billar.
Sitio web: www.nongnu.org/billiards

OpenTTD 0.7.0-beta1

Os rapaces do OpenTTD xa sacaron unha nova versión de desenvolvemento, a 0.7.0-beta1, que inicia o traxecto cara a versión 0.7.0 final.

Entre os cambios da inmensa lista cabe salientar:

• posibilidade de ter abertas múltiples fiestras á vez coa caixa de edición,
• posibilidade de cambia-lo set gráfico dende a fiestra de opcións do xogo,
• posibilidade de agrupar e despregar a lista de gastos e ingresos da fiestra de finanzas da compañía,
• soporte nativo pr’as partidas gardadas do Transport Tycoon orixinal,
• o límite de compañías aumenta a 15,
• o límite de clientes nas partidas colectivas aumenta a 255,
• cando a lingua seleccionada non cadre coa fonte de letra, buscarase automaticamente unha fonte de letra axeitada,
• posibilidade de ordea-los vehículos en función do tempo de vida restante,
• posibilidade de devolve-lo nome por defecto aos coches, edificios, etc.,
• máis información na lista de servidores,
• posibilidade de posuír máis de dous aeroportos por cidade,
• e por suposto moitos máis cambios e unha morea de correccións.

Os que queirades instalar esta versión en desenvolvemento, ben pra colaborar ben por ansia, podedes ir xa á páxina de descargas. Bo proveito!

Fonte: sitio web do xogo

	OpenTTD 0.6.3
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

Rigs of Rods 0.36, primeira versión libre

Os desenvolvedores do Rigs of Rods finalmente publicaron a versión 0.36 do xogo.

Nela poderemos gozar de novos automóbiles e terreos. Todo hai que dicilo, algúns aínda están en fase de probas. Entre as novas características cabe salientar:

• efectos ambientais nos mapas,
• soporte pra sombras,
• novas físicas de fricción do terreo (máis realista que nunca),
• sons personalizados,
• nova interface de usuario,
• reorganización dos ficheiros,
• e moito máis.

“Grazas a todas as persoas que axudaron á realización desta versión. Un agradecemento especial a Box5diesel, Lifter e Sneer polo seu traballo prolífico e de gran calidade. Grazas a Thomas polo seu duro traballo axudándome a levar adiante este lanzamento. Grazas a todos os doantes, voluntarios e moderadores do foro.”

E o máis importante. Agora o proxecto está baixo licenza GPL, e os novos lanzamentos aloxaranse en SourceForge.

AVISO: no momento de escribir este artigo non hai publicada unha versión do lanzamento pra Linux, nin tampouco o código fonte pra compilalo. Ata que sexa publicado o código fonte, e o xogo sexa compilable (polo menos) en Linux, non vos volverei traer noticias ao respecto.

Fonte: blogue do xogo

	Rigs of Rods 0.36
Xogo de simulación de automóbiles que salienta polas posibilidades de deformación dos vehículos.
Sitio web: rigsofrods.blogspot.com

Rigs of Rods libera o seu código

Os desenvolvedores do Rigs of Rods, un xogo de simulación de automóbiles, decidiron libera-lo código do xogo baixo licenza GPL v3 xunto co lanzamento da súa vindeira versión, a 0.36. Argumentaron pra este importante cambio de licenza diversos motivos:

• Pretenden deste xeito atraer e motivar a máis voluntarios e colaboradores.
• O cambio, ademais, lles permitirá aos desenvolvedores actuais tomarse un respiro. O xogo xa se lles queda grande, o que é normal tendo en conta que son só dúas persoas. Ademais queren pasar páxina e traballar noutros proxectos novos, posiblemente relacionados co Rigs of Rods, pero non queren que iso “mate” o proxecto.
• Pra devolverlle o favor a todos eses proxectos de código aberto que lles deron a posibilidade de de utiliza-lo seu código baixo licenza LGPL, coma Ogre3D.
• Pra poder facer uso dos recursos que ofrece SourceForge aos proxectos de código aberto.
• Pra simplifica-lo porte do xogo á plataforma Linux.

Este cambio non influirá no lanzamento da versión 0.36, que está case rematada -o código xa está listo, e os desenvolvedores están a seleccionar e proba-lo contido-.

Di un dos desenvolvedores que haberá un anuncio máis formal da liberación do código fonte do xogo pra así difundi-la palabra unha vez que saia a versión 0.36.

Fonte: JeuxLinux

	Rigs of Rods 0.35 (aínda privativa)
Xogo de simulación de automóbiles que salienta polas posibilidades de deformación dos vehículos.
Sitio web: rigsofrods.blogspot.com

LinCity-NG 2.0

O que oídes, os rapaces responsables do LinCity-NG, clon das primeiras versións do Simcity, tráennos unha nova versión estable, a 2.0.

Na lista de cambios con respecto da versión anterior atopamos:

• xestión da auga, que será a partires d’agora un recurso máis,
• tamén será posible construír pontes sobre os ríos,
• cambiou o formato en que se gardan as partidas e mailo directorio (aínda que podedes continuar partidas vellas),
• mellora do apartado gráfico,
• actualización das traducións ao alemán, holandés, brasileiro, ruso, checo e sueco,
• e a posibilidade de especifica-lo tipo de letra pra cada lingua.

Podedes descarga-lo código fonte pra compilalo dende aquí (máis información), e vos aseguro que a min me baixou a máis d’ 1MB/s. E como non, os que teñades unha instalación de 32 bits (as normais), tende-la vida máis fácil con este instalador automático (máis información).

Máis nada. Eu persoalmente nunca xoguei a este xogo, nin ao Simcity, pero en verán hei de probalo (como moitos outros). Vale, xa o probei esta fin de semana. Está moi ben, e os gráficos son a ter en conta (non vale comparar con xogos privativos, ollo!). Iso si, ao principio non era quen de evita-la bancarrota. Porén, agora mesmo estou a levar unha cidade moi ben (tras ler algo das axudas, malo ía ser non enterarse). Un saúdo!

Fonte: sitio web do proxecto

	LinCity-NG 2.0
Trátase dun rexurdimento do Lincity, cunha lóxica que se asemella á do Simcity 1 e uns gráficos coma os dos Simcity 2000 e 3000.
Sitio web: lincity-ng.berlios.de