Wesnoth… 1.6!

O que ledes, xa saiu a versión 1.6 do Battle for Wesnoth, un xogo de estratexia… bueno, xa deberías saber de que vai -se non o sabes, instálao -. Máis dun ano de desenvolvemento dende a última versión estable, a 1.4, e máis de 3.000.000 de descargas dende SourceForge (que se di moi fácil).

As notas do lanzamento non están aínda traducidas ao galego (e non sei como traducilas), pero vos deixo unha tradución miña:

Unha vez máis é a hora dun momento dos que marcan época, un lanzamento estable do Wesnoth. O equipo do Battle for Wesnoth orgullécese de liberar a versión 1.6 do Battle for Wesnoth, un xogo libre de estratexia por roldas de ambientación fantástica e elementos de rol. O xogo está dispoñible para a súa descarga para Windows, Mac OS X e varias distribucións de GNU/Linux.

Que novidades trae Wesnoth 1.6?

Contamos con moitas características novas para que goces delas estes días, entre elas unha nova campaña oficial, dous novos escenarios para o xogo en liña e unha renovada interface de usuario.

Para os xogadores

Campañas

Hai unha nova campaña oficial, A Lenda de Wesmere (que estou a traducir nestes momentos ao galego, e espero remate pr’a vindeira versión da rama estable, a 1.6.1), con novas características de xogo incluíndo (nun escenario) a posibilidade de utilizar a intelixencia artificial do xogo como o teu comandante para un dos aliados, establecendo ti os obxectivos que gustes. Busca esta característica agochada premendo co botón dereito nos comandantes aliados, durante o escenario número 7 (e o dicides agora? Creo que vou polo 8!!!). Esta campaña importouse desde o proxecto Wesnoth-UMC-Dev, onde pasou un par de meses para adaptala ao argumento principal.

Case todas as campañas oficiais usan agora un método distinto para manexar o ouro conservado dun escenario ao seguinte: a cantidade de ouro retido é agora o 40% en vez do 80% (coido que n’A Lenda de Wesmere aínda está no 80%), pero engádese ao ouro mínimo co que se comeza o seguinte escenario en lugar de substituílo cando é maior.

Moitas das campañas principais melloraron a narración do argumento e novas escenas cortadas e epílogos. Moitas delas melloraron e renovaron os mapas de campaña. Todas elas teñen agora datas na liña do tempo da historia de Wesnoth, e case todas teñen animacións das viaxes no mapa de campaña. A historia e xeografía de Wesnoth foi desenvolvida máis a fondo e con maior detalle: agora hai máis campañas que inclúen referencias a eventos da historia xeral, engadindo profundidade e enriquecendo a narración.

Xogo en liña

Agora pode entrarse no servidor de partidas en liña utilizando o nome de usuario e contrasinal da conta do foro de Wesnoth. Así e todo, non fai falla rexistrarse e calquera pode seguir utilizando un nome de usuario sen rexistrar.

O vestíbulo de partidas en liñas (onde atopas as partidas e aos xogadores) mellorou para permitir unha xestión máis sinxela das listas de amigos e de xente a ignorar premendo dobre co rato na lista de xogadores.

Entre os cambios máis salientables para equilibrar as eras por defecto están:

• aumento do custo do trasno lanceiro de 8 a 9,
• aumento do movemento do trasno lanceiro de 4 a 5,
• aumento do ataque corpo a corpo do trasno lanceiro de 4-3 a 6-3,
• engadido dos rasgos débil, lento e preguiceiro (poden non corresponderse coas traducións oficiais); os trasnos han recibir cada un un deles en vez de dous dos comúns,
• engadido do tirador especial ao ataque a distancia da liña do orco asasino,
• incremento do custo do cadáver andante de 7 a 8,
• diminución do custo do arqueiro de 15 a 14,
• diminución do ataque corpo a corpo do arqueiro de 6-2 a 4-2.

Xeral

Melloráronse os gráficos do xogo cunha nova gama de retratos de unidades. Moitas máis unidades contan con animacións completas e cor do equipo.

Hai un novo tipo de terreo básico, arrecife costeiro, que lle dá á meirande parte das unidades terrestres unha defensa algo maior que nas augas pouco profundas, e 70% de defensa para a maioría das unidades mariñas coma os sirénidos e mailos nagas. Os bosques adquiren maior variedade con gráficos para terreos de bosque caducifolio en primavera/verán, outono e inverno. Hai novos gráficos para as vilas das cidades dos humanos e zonas de tribos primitivas.

Os nosos compositores engadiron cinco novas pistas musicais de fondo: Heroes’ Rite, Siege of Laurelmor, Suspense, The Dangerous Symphony e The Deep Path. Ademais, agora o xogo reproduce fragmentos musicais especiais para os casos de vitoria e derrota.

A interface do xogo seguiu evolucionando, en especial no uso máis dramático dos retratos. Os diálogos de reincorporar unidades agora amosan información útil sobre os rasgos dos teus veteranos. Agora os complementos amosan a súa categoría cando navegas por eles no servidor de descargas.

Entre as novas traducións atopamos o árabe, o croata, o friulano, o macedonio, o marathi e mailo letón. As traducións existentes actualizáronse e extendéronse amplamente. Coido que o galego aínda non foi actualizado pra esta versión, así que a ver se pra seguinte xa está.

Ata aquí traduzo, o resto é información pra desenvolvedores e sobre as descargas. Se vos interesa o primeiro, deberiades ir ao anuncio oficial en inglés, e respecto do segundo, só necesitades saber unha cousa:

Páxina de descarga

Só me resta mencionar que de cara ao desenvolvemento da póla 1.7 (inestable), o equipo busca tradutores (ao galego supoño que non lle virían mal, se vos interesa ide aquí ou deixádeme un comentario), artistas gráficos (sprite, retratos, terreo, ilustracións das historias), compositores musicais (con idea de composición de música clásica, e requírese un bo equipo), artistas de son (para os efectos especiais), autores (escritura/mantemento das campañas, creando contidos tales coma descricións de unidades, e mellorando a axuda interna do xogo) e, por suposto, programadores. Se queres participar no desenvolvemento de Wesnoth, bótalle unha ollada ao foro ou visítanos na canle IRC #wesnoth-dev en irc.freenode.net.

Fonte: sitio web do xogo

	The Battle for Wesnoth 1.6
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.14, terceira (e derradeira?) candidata á versión 1.6

O equipo de desenvolvedores do Battle for Wesnoth trouxéronnos a que probablemente sexa a derradeira versión da póla inestable 1.5.x. Esta nova versión, co 1.5.14 por código, pretendeu eliminar tódolos erros posibles.

Así que xa podedes probar esta candidata a versión final. Din os desenvolvedores que “necesitan da nosa colaboración pra cerciorarse de que a nova 1.6 sexa incluso mellor e máis estable que a póla 1.4.x”. Por tanto, pídennos que “vos fagades con este lanzamento e informade de canto erro atopedes“. Eu, de paso que procuro rematar a tradución ao galego dunha das campañas do xogo, a ver se atopo algo do que informar.

Velaquí vai a miña selección de cambios (déixovos tamén ligazóns ás hamburguesas listas de cambios normal e completa):

• últimos retoques nalgunhas campañas,
• bastantes retratos novos prao novo sistema de diálogos,
• novas variantes das plantas do deserto,
• actualizacións das traducións ao catalán, chinés simplificado, checo, neerlandés, finés, alemán, hebreo, húngaro, lituano, noruego, polaco, ruso e eslovaco.
• actualización do tipo de letra, DejaVuSans (o que traen por defecto moitas distros de GNU/Linux) á súa versión 2.29,
• substitución dos tipos de letra sazanami-gothic.ttf e wqy-zenhei-gb2312.ttf polo wqy-zenhei.ttc
• engadiuse a pista de música “Siege of Laurelmor” (O sitio de Laurelmor), obra de Doug Kaufma,
• o tamaño dos diálogos de mensaxes agora pasa a depender do tamaño do mapa,
• volve ser posible utiliza-lo botón dereito do rato pra cancelar os “arrastrar e soltar”,
• e múltiples correccións de erros, entre as cales cabe salientar:
  • ao descargar complementos (add-ons), non aparecerán na lista de campañas ata que reinicie-lo xogo,
  • correccións dalgúns erros relativos á selección de unidades durante o movemento doutras,
  • corrección dun erro da intelixencia artificial (polo que o líder era agresivo de máis),

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.13, segunda candidata á versión final 1.6

Os desenvolvedores responsables do Battle for Wesnoth xa teñen unha segunda candidata á versión estable definitiva (1.6). Trátase da nova versión 1.5.13.

Aquí vos vai unha lista dos cambios, selección propia dos cambios da lista completa:

• novos retratos prao novo sistema de diálogos,
• actualización das traducións ao chinés simple, checo, francés, finés, húngaro, polaco, ruso, eslovaco e turco;
• solucionado o problema polo que podía acontecer que dous usuarios dunha partida en liña visualizasen mesmas unidades con gráficos distintos,
• renomeamento dalgúns atributos da intelixencia artificial, que disque non estaban en correcto inglés (é o que ten que haxa tanto colaborador estranxeiro )
• e outras tantas correccións de erros e melloras de rendemento.

Isto vai quedando niquelado. Se vos apetece compilar, podedes descargar o código desta versión (inestable en teoría) e seguir as instrucións correspondentes. Bo proveito!

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.12, primeira candidata á versión final 1.6

Os rapaces do Battle for Wesnoth xa teñen unha primeira candidata á versión estable definitiva. Estou a falar da nova 1.5.12.

Déixovos unha lista de cambios, selección propia dos cambios da lista completa:

• non se permite subir engadidos aos servidores sen especificar un título, tipo, autor, versión ou descrición e avisar das versión non compatibles,
• novos retratos prao novo sistema de diálogos,
• novas texturas praos bosques caducifolios e a sucidade,
• uso de árbores caducifolios e mixtos nalgunhas das campañas, aínda non en todas,
• actualización das traducións ao chinés (simple), checo, francés, alemán, italiano, polaco, brasileiro, castelán e turco,
• o diálogo de partida colectiva volve amosar axudas,

Aos poucos ímonos achegando á definitiva. Que nervios! En fin, se vos apetece compilar, podedes descargar o código desta versión (inestable en teoría) e seguir as instrucións correspondentes. Bo proveito!

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.11 alias 1.6-beta3

Os desenvolvedores do Wesnoth xa sacaron outra achega á futura póla estable 1.6. Trátase da versión 1.5.11.

Coma sempre, os rapaces do Wesnoth téñennos preparadas a lista de cambios normal e a completa. Parecen hamburguesas, máis que listas. Velaquí vai a miña:

• o servidor de campaña rexeitará os engadidos (add-ons) sen un tipo especificado,
• se o tipo do engadido non é válido, recibiremos un aviso,
• novos gráficos de unidades,
• novas animacións pra unidades paradas,
• novos retratos de unidades (pra o novo sistema de diálogos),
• actualización das traducións ao checo, francés, alemán, hebreo, lituano, polaco, ruso e castelán;
• o xogo non volverá reiniciar ou deter unha canción ao cambiar de escenario ou cargar unha partida se dita canción está presente na lista de reprodución do novo escenario (non parece moi importante, pero coido que é deses cambios que sen notalos moito os agradeces),
• e, por suposto, unha morea de melloras e correccións de todo tipo.

Respecto da actualización ao galego, como puidéchedes comprobar, non houbo en moito tempo. Pero non vos preocupedes, que estará lista pr’a chegada da versión estable (a 1.6).

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.10 alias 1.6-beta2

Os desenvolvedores do Battle for Wesnoth teñen xa preparada a segunda beta da que será a versión 1.6 do xogo. Trátase da versión 1.5.10.

Como nos teñen afeitos, os rapaces do Wesnoth preparáronnos dúas listas de cambios, a reducida e a completa. Velaquí van os cambios que creo cabe salientar:

• non se poderá renomear ningún dos líderes controlados polos humanos,
• novos retratos (pra o novo sistema de diálogos),
• novos gráficos de unidades e melloras neles,
• novas animacións pra cando as unidades non fan nada,
• variacións gráficas pr’as vilas mariñas,
• nova tradución ao maratía, e actualización das traducións ao inglés británico, neerlandés, francés, alemán, húngaro, italián, ruso, esloveno, castelán e sueco.
• actualización de mapas pra o modo en liña,
• eliminación da opción pra correxi-lo gamma,
• solución do problema polo que ao cambiar algunhas configuracións o Wesnoth íase.

Os que queirades xa podedes ir á páxina de descargas e compila-lo código fonte. Calquera erro que atopedes, reportádeo.

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.9 alias 1.6-beta1

Xa era hora, os do Battle for Wesnoth teñen xa unha versión de desenvolvemento considerada a primeira beta da futura versión estable 1.6. Trátase do lanzamento da 1.5.9. Polo de agora completáronse tódalas novas características e os futuros cambios terán por obxectivo pulir os contidos actuais e elimina-los bugs que aínda queden. A nivel usuario, xa se podería descargar esta beta, que xa conta cunha usabilidade básica. Porén, en pouco ha chegar a 1.6 definitiva.

Un dos cambios máis salientables desta nova versión é a completa implementación do novo sistema de diálogos, moi bonitiño el. Os retratos das personaxes foron traballados e, polo menos, xa ningún leva o fondo negro (o novo sistema require un fondo transparente pra lucir ben).

As traducións en xeral fixeron grandes avances, completándose a tradución ao castelán e ao checo. O galego está na posición 15 de 45 linguas, sendo tra-lo castelán a segunda lingua peninsular coa tradución máis completa. Se vos interesa colaborar na tradución, ide aquí.

Coma sempre, os desenvolvedores téñennos preparadas dúas listas de cambios, unha pra persoas normais, e outra con tódolos cambios. Velaquí van algúns do resto dos cambios:

• novos gráficos pra o anano mineiro, e melloras noutros,
• novos retratos pra numerosas personaxes, e todas sen fondo negro,
• actualización das traducións ao catalán, chinés tradicional, checo, dinamarqués, francés, alemán, húngaro, italiano, polaco, eslovaco, castelán e valenciano.
• novos terreos de bosque pra verán, outono e inverno,
• e, como non, correccións de bugs.

Xa podedes atopa-lo código fonte na páxina de descargas, e segui-las instrucións pra compilalo. Calquera erro que atopedes, non esquezades informar del pra así colaborar co desenvolvemento deste abraiante xogo de estratexia por roldas tan popular.

Fonte: sitio web do xogo

	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: www.wesnoth.org

Wesnoth 1.5.8, a batalla pola 1.6 continúa

Os desenvolvedores do Battle for Wesnoth están de volta pra ofrecernos un novo lanzamento dentro da súa rama inestable, na cal se está a levar a cabo o desenvolvemento activo que terá como resultado a versión estable 1.6. Pero deixémonos de pa***s mentais e vaiamos coa versión que nos ocupa hoxe, a 1.5.8.

Os novos diálogos están a mellorar sen descanso, e resolvéronse unha morea de erros relativos ao seu novo sistema. A conta do sistema de diálogos tamén se reeditaron moitos retratos, que agora son simplemente abraiantes. As traducións fan un progreso incrible, destacando a alemá, que acadou o 100%, e a tradución ao galego a cargo do proxecto Trasno, que vai con bo rumbo (imos no posto 14, subimos 3 postos con respecto da versión estable).

Como ocorreu cos anteriores lanzamentos, temos á nosa disposicións dúas versións da lista de cambios: unha pra seres humanos cos cambios que calquera xogador habería de notar, e outra pra aqueles que se atrevan a le-la guía dun microondas antes de comezar a utilizalo (se sodes destes últimos, noraboa!), que trae todos os cambios. Velaquí algúns dos cambios máis salientables:

• adaptación de máis campañas ao novo sistema económico,
• aumento da dificultade nalgunhas,
• unha morea de novos retratos (responsables dun aumento no tamaño do xogo),
• actualización de numerosas traducións (a galega aínda non está cargada, pero está a facerse de xeito externo),
• engadido modo gráfico pra algunhas funcións de xogo en liña,
• posibilidade de premer dúas veces nun xogador pra unirse á súa partida,
• opción pra garda-los contrasinais,
• mellora do comportamento dos novos diálogos,
• e solución pra unha morea de erros.

Xa podemos descargar o código fonte da páxina de descargas e compilalo. Se temos as dependencias precisas, non ha ser nada do outro mundo, pero lede a guía pra a compilación antes. E recordade que se trata dun lanzamento dentro da rama inestable, e que ha ter bastantes erros. Se atopades algún, plantexádevo-la posibilidade de colaborar cos desenvolvedores deste grandioso xogo informándoos.

Fonte: sitio web do xogo

4	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: wesnoth.org Galipedia: The Battle for Wesnoth (descarga)

Wesnoth 1.5.7, agasaio polo Nadal

Pra comezar un bo 2009, os desenvolvedores do Battle for Wesnoth trouxéronnos unha nova versión na rama inestable, a 1.5.7.

Como levan facendo ultimamente, os desenvolvedores puxeron á nosa disposición dous changelogs, un cos cambios máis salientables e que o xogador podería notar facilmente, e outro con case tódolos cambios pensado pra producirlle á xente unha grande dor de cabeza -prohibido lela se se está con resaca, moi común nestas festas-.

Os cambios que máis chaman a atención son a adaptación ao novo motor de renderizado de máis diálogos do xogo -como se amosa na imaxe-. Esta adaptación aínda non é completa, e hai moitos erros ao respecto, na corrección dos cales centraranse os desenvolvedores estas semanas.

Tamén está a adaptación de moitas campañas ao novo sistema de xestión dos cartos dun mapa a outro da campaña. Isto significa que o equilibrio de moitas campañas cambiou. Se notas que algunha xa non está equilibrada, comunícallo ao equipo deixando unha anotación (en inglés) neste tema do foro.

No que respecta ás traducións, avanzaron bastante. En concreto, a galega vai vento en popa, e Leandro Regueiro (o coordinador) está a facer un traballo incrible. Eu pola miña parte teño pensado traducir dúas aplicacións (o Frozen Bubble e mailo DJL) antes de poñerme con algunha campaña do Wesnoth. Se queredes colaborar na tradución, lede isto.

Na páxina de descargas tende-lo código fonte e a fermosa guía pra compilalo (en inglés). Se a instalades, recordades que vai haber moitos bugs -chámaselle rama inestable por algo-, así que plantexádevos colaborar informando deles (en inglés tamén, por suposto), e así axudar a que a vindeira versión estable, a 1.6, teña os menos erros posibles.

Fonte: foro do xogo

4	The Battle for Wesnoth 1.4.7
Xogo de estratexia por roldas ambientado nun mundo fantástico, Wesnoth. Caracterízase por unhas regras moi simples, e xógase en mapas hexagonais (formados por hexágonos).
Sitio web: wesnoth.org Galipedia: The Battle for Wesnoth

Wesnoth 1.4.7, versión de mantemento

The Battle for Wesnoth

Xa está dispoñible unha nova versión na rama estable do Battle for Wesnoth, un dos xogos libres máis populares.

Esta versión, como parte da rama estable, adicouse principalmente á corrección de erros e actualización de traducións. Agora, por exemplo, a repeticións das campañas pra un só xogador deberían funcionar (a maioría das veces).

Na versión do changelog cos cambios máis salientables podemos observar:

• unha nova animación para cando a princesa Li’sar da campaña Herdeiro ao Trono non estea a facer nada,
• actualización dos gráficos das unidades mestre de grifón e adestrador de grifóns,
• actualizacións das traducións dinamarquesa, finlandesa, húngara e italiana,
• e a corrección que antes mencionamos das repeticións de partidas.

Polo de agora hai dispoñibles binarios pra Debian, Gentoo, Mac OS X e Windows. Unha vez rematado-los outros atoparédelos na páxina de descargas. Con sorte xa non haberá ningún bug máis, pero se atopades algún, xa sabedes, avisádelles.

Con respecto á tradución ao galego, está moi avanzada. Leandro, coordinador da tradución ao galego do xogo, está a facer un enorme traballo, xunto co resto dos tradutores, e con sorte os de Trasno habemos completa-la tradución para a versión 1.6 do Wesnoth, a seguinte rama estable do xogo.

Así que xa sabedes, a probalo!

Sitio web: wesnoth.org