O sitio web do STK cambia de look

Pois nada, só era iso. Recoméndovos que vos deades unha volta polo novo sitio web do SuperTuxKart. A estas alturas o blogue xa se adaptou ao novo deseño, e cabe a posibilidade de que a vindeira versión do xogo tamén se inspire un pouco neste look.

O autor deste deseño foi Tom Jenkins, de icecubewebdesign.co.uk

Máis nada supoño. Iso si, non esquezades que este deseño está aínda desenvolvéndose, e acéptanse opinións.

Fonte: blogue do xogo

SuperTuxKart 0.6.1
Xogo de carreiras sobre karts con personaxes da familia Tux coma condutores e cunha ambientación infantil, pero recomendable pra tódalas idades.
Sitio web: supertuxkart.sourceforge.net

Neverball 1.5.1

Neverball, un crebacabezas en tres dimensións, sacou a súa versión 1.5.1.

Na súa lista de cambios podemos salientar algúns tales coma:

• posibilidade de configurar os botóns do rato (control completo da vista),
• engadido de controis para cambiar entre as vistas manual e de seguemento,
• gardado e carga real da configuración dos joysticks,
• actualización das traducións ao alemán, francés e catalán;
• e moitos máis.

Só unha cousa queda por dicir: bo proveito!

Fonte: The Linux Game Tome

Neverball 1.5.1
Xogo cuxo obxectivo consiste en balancear o chan para mover unha bóla a través dunha serie de obstáculos antes de que se esgote o tempo. Inclúe o Neverputt, xogo de golf en miniatura para varios xogadores que utiliza os mesmos gráficos e maila mesma física.
Sitio web: neverball.org

Atomic Tanks 3.5

O Atomic Tanks sacou hai nada a súa versión 3.5. Esta versión, ademais de correxir erros da anterior, engadiu ao xogo unha morea de melloras.

Entre outros cambios:

• volveuse escribir o sistema de gardado e carga das preferencias do xogo e das partidas, polo que non se poderán exportar as partiadas anteriores;
• o fume agora semella máis realista,
• correción de erros no sistema de puntería dinámica da intelixencia artificial,
• outras melloras e correción de erros que deberedes descubrir por vós mesmos.

Fonte: The Linux Game Tome

Atomic Tanks 3.5
Xogo de estratexia por roldas en dúas dimensións.
Sitio web: atanks.sourceforge.net

Glest 3.2.2

Hai relativamente pouco viu a luz unha nova versión do Glest, un xogo de estratexia en tempo real e en tres dimensións -si, lichedelo ben-, que puxo fin a dous erros relativos ao xogo en rede.

As coreccións desta versión, a 3.2.2, debémosllas a un usuario que, xogando coa súa familia nunha rede local, e fozando un pouco no código fonte do xogo, descubriu a causa de dous erros que sufrira durante as partidas en rede.

O home explicou cales eran os erros e como os solucionara nun fío do foro do xogo, e os seus parches aplicáronse ao xogo.

Fonte: The Linux Game Tome

Glest 3.2.2
Xogo de estratexia en tempo real e en tres dimensións. Conta con dúas faccións (máxica e tecnolóxica).
Sitio web: glest.org

Nexuiz 2.5

Tras case un ano de traballo por parte do seu equipo de desenvolvedores, o Nexuiz, un xogo de tiros en tres dimensións bastante popular no panorama do software libre, fixo pública hai nada a súa seguinte versión, a 2.5

Entre os cambios presentes nesta nova versión cabe salientar:

• un HUD completamente redeseñado, coa posibilidade de personalizar a táboa de puntuacións,
• redución á metade do consumo de ancho de banda nas partidas en liña, grazas a unha mellor comunicación cliente/servidor;
• inclusión de novos mapas, sons, voces, efectos, texturas, punteiros, estilos de interface e unha morea de armas;
• mellora da intelixencia artificial dos bots, así como redución do seu uso de procesador;
• soporte para a gravación de vídeo en OGV,
• inclusión de novos elementos aos mapas para sumarlles dinamismo,
• engadido do editor de mapas NetRadiant,
• mellora dos efectos visuais, agora moito máis atractivos,
• recompilación dos mapas con iluminación externa para unha mellora das sombras,
• unha morea de funcionalidades relativas aos torneos,
• cambio na estrutura do menú, así coma mellora do mesmo,
• e, por suposto, múltiples correccións de erros.

Ademáis diso, retomouse o soporte para múltiples campañas no modo de xogador individual, e engadiuse un novo modo de xogo, Race (carreira en inglés), no que hai que percorrer un mapa pasando por unha serie de zonas (checkpoints) en el menor tiempo posible.

Se todos estos cambios non son abondo para vós, sempre podedes ver a lista de cambios completa.

Fonte: LinuxJuegos

Nexuiz 2.5
Xogo de tiros en tres dimensións con impresionantes gráficos.
Sitio web: alientrap.org/nexuiz

Freeciv 2.1.9

O Freeciv, o xogo de estratexia por roldas, xa ten unha nova versión, a 2.1.9. Trátase dun lanzamento destinado á mellora da experiencia no xogo en liña, o mellor ata o momento no que a este aspecto do xogo se refire.ç

Na lista de cambios (hai dispoñible tamén unha versión completa da mesma) atopamos entre outros:

• cambio do formato do nome dos ficheiros de partidas gardadas,
• cambio do servidor principal polo dispoñible en cazfi.net,
• mellora na interface en gtk do xogo para que encaixe ben nunha resolución de 800×600,
• mellora do sistema de selección masiva de unidades,
• mellora do destprazamento automatico da da fiestra de conversa,
• engadido da opción para que nas mensaxes da conversa apareza a hora en que se enviaron,
• engadida a opción para dar preferencia ás cidades sobre as unidades cando se faga un cadrado co rato para seleccionalas,
• opción para amosar o custo de produción nas descricións das cidades,
• opción para non borrar as ordes das unidades ao seleccionalas,
• engadida unha vista da lista de persoa presentes no servidor na páxina de xogo en liña,
• engadido botón para cambiar a conversa en liña, entre a conversa global e a conversa cos aliados,
• actualización das traducións ao finés, calatán, estoniano, danés, lituano, alemán, coreano e sueco.

Fonte: sitio web do xogo

Freeciv 2.1.9
Xogo de estratexia por roldas, cunha gran comunidade detrás e moitas civilizacións dispoñibles.
Sitio web: freeciv.wikia.com

OpenTTD 0.7.0

Por fin, a nova versión estable do OpenTTD xa está dispoñible ao público. Os cambios máis relevandes desta versión 0.7.0 son, entre outros:

• traballouse nun sistema de ordes renovado,
• posibilidade de posuír moitos máis mecanismos,
• sinais baseadas nos camiños,
• un framework da intelixencia artificial que permite a quen o desexe facerse a súa propia IA,
• descarga directa de intelixencias artificiais e fgráficos desde un servidor principal (cando o autor así o desexe),
• bordos terrestres nos mapas,
• inicio do soporte para linguas escritas de dereita a esquerda, coma o árabe e mailo hebreo,
• incremento ou decremento dun bo número de límites: tamaño das fiestras, número de fiestras, clientes en liña (agora 255), compañías (agora 15);
• seis novas traducións: ao árabe, hebreo, lingua indonesia, letón, luxemburgués e galés.

Fonte: sitio web do xogo

OpenTTD 0.7.0
Clon do Transport Tycoon Deluxe, trátase dun xogo de simulación económica no que administrarás unha compañía de transportes.
Sitio web: www.openttd.org

Vacuum Magic 0.11

O Vacuum Magic xa ten nova versión, a 0.11.

Nos cambios con respecto da versión anterior atopamos:

• unha nova bonificación: o escudo de lume; trátase da bonificación máis poderosa que pode obter o xogador, e que lle fornece un abraiante potencial tanto defensivo coma ofensivo;
• un novo fondo e nova música, cun tema de Samaín,
• a “mala” Meiga robótica solta unha bandada de morcegos cando a fires,
• o “malo” Bombas agora é menos mortífero,
• varios axustes e correccións.

Fonte: The Linux Game Tome

	Vacuum Magic 0.11
Xogo de acción en dúas dimensións en que recolleremos froita e mataremos monstros. Como na vida real, vamos.
Sitio web: apocalypse.rulez.org/vacuum

Pandora achégase ao seu estado definitivo

Pandora é, para aqueles que aínda non o saibades, unha consola portátil libre cun sistema operativo libre para xogar a xogos libres con total liberdade. Iso é ser libre e o demáis son tonterías. O estado actual do desenvolvemento da consola está moi preto da súa etapa final, restando só algúns pequenos axustes.

A consola xa se pode reservar, e o seu custo é de 330 dólares, o que equivale a pouco menos de 250€. Claro que hai que ter en conta que non ides necesitar mercar nin un só dos xogos que usedes nela (salvo que queirades doar cartos a un dos proxectos, claro está).

Entre as características da consola atopamos:

• Procesador: ARM® Cortex™-A8 600Mhz+.
• Sistema operativo: GNU/Linux.
• Tarxeta gráfica: PowerVR SGX OpenGL 2.0 ES compatible con aceleración en tres dimensións.
• Pantalla táctil LCD cunha resolución máxima de 800×480, 4.3 polgadas e 16.7 millóns de cores.
• Altofalantes con soporte para estéreo acoplados na pantalla, e micrófono integrado, así coma unha roda para controlar o volume.
• 256 MB de memoria RAM do tipo DDR.
• 512 MB de espazo interno, ampliable con memorias USB ou tarxetas SDHC.
• Wifi 802.11b/g, Bluetooth e porto USB 2.0 de alta velocidade.
• Dúas ranuras para tarxetas SDHC e saída SVideo de televisión.
• Controis de xogo tanto analóxicos coma dixitais.
• 43 botóns QWERTY (distribución inglesa do teclado) e teclas numéricas.
• Arredor de 10 horas de duración da batería.

Teño que recordarvos que todas as características da consola foron discutidas previamente cos usuarios nos foros co obxectivo de obter a consola portátil de código aberto definitiva. Na consola xa se probaron xogos coma o Quake 3, ou programas coma o Firefox 3, que funcionan sen problemas.

Fonte: LinuxGames

Simsu 1.2.0

Tradúzovos completamente a anotación no blogue do desenvolvedor do Simsu en que explica o que fixo nesta nova versión, a 1.2.0.

Hoxe (o 28 de marzo) liberei a versión 1.2.0 do Simsu. Todo comezou moi inocentemente. Só un par de retoques á interface, que acabaron convertíndose nun novo deeseño que permitise que o xogo se vise ben maximizado en pantallas panorámicas. Antes de que me decatase, xa substituíra o xerador de solucións porque era lento de máis. E entón engadín un resolvedor de crebacabezas máis sinxelo baseado no xerador orixinal. A partires de aí decidín que estaría ben dar soporte a todos os diferentes tipos de simetría. Detívenme antes de que puidese facer nada máis. Quen sabe o que lle reserva o futuro ao meu xogo “básico” de sudoku?

Máis nada, que vos aproveite. Na páxina de descargas hai unha versión para Linux que é un binario xa compilado (é dicir, arrinca o xogo premendo nel, unha ou dúas veces segundo como teñades configurado o voso sistema).

Fonte: blogue do desenvolvedor

Simsu 1.2.0
Xogo de sudoku cun bo deseño e moi completo.
Sitio web: gottcode.org/simsu